31 ოქტომბერს, 70 წელი შეუსრულდება ბიზნესმენს და მეცენატს ბადრი პატარკაციშვილს. ბადრისთან დაკავშირებით საზოგადოებაში არსებობს განსხვავებული მოსაზრებები, ესეც პოლიტიკიდან მომდინარეობს, რომელშიც ბადრი პატარკაციშვილი გარდაცვალებამდე რამდენიმე თვით ადრე ჩაერთო. ამ ეპილოგის დანიშნულება არ არის არც ის გაარჩიოს რამდენად სწორი და გამოუვალი საჭიროება იყო ბადრის მხრიდან ამ ნაბიჯის გადადგმა რამაც სიცოცხლე მოუსწრაფა, და არც ის რომ გაარჩიოს საზოგადოების ეკლექტიკური დამოკიდებულება მისი პიროვნების მიმართ. ეს სხვა დროს იყოს, მითუმეტეს, ცხოვრების ირონია და ერთგვარი ტრაგიკომედიაა, რომ ბადრის პიროვნებაზე მისი გარდაცვალების შემდეგ, საუბრობს ყველა ის, ვისაც არც შეხება ჰქონია მასთან, არც არაფერი განსაკუთრებული აკავშირებდა, მეტიც, მძიმე და რთული ურთიერთობები ჰქონდათ ბადრისთან მის სიცოცხლეშივე, მაგრამ როგორც ძირითადში საქართველოში ხდება, ცხვრის ფარა რომ შემობრუნდება, კოჭლი ცხვარი წინ დარჩებაო - ისეა ამ ამბის გაგრძელება, 2008 წლის თებერვლის შემდეგ, როცა ბადრი პატარკაციშვილმა, მე დიდი იმედი მაქვს, უკეთეს სამყაროში გადაინაცვლა. ბადრის 70 წლის დაბადების დღეზე ვიტყვი ერთს მასთან დაკავშირებით. მიუხედავად ყველაფრისა, ბადრის ჰქონდა ერთი გამორჩეული თვისება, მან იცოდა წაგება და იცოდა წაგების აღიარება. უკიდურესად მწყდება გული, რომ ეს ბოლო წაგება მისმა გულმა ვერ გაუძლო. რადგან მგონია, რომ საქართველო ბევრად უკეთესი და სხვანაირი იქნებოდა ცოცხალი ბადრი პატარკაციშვილისას. მთელი მისი ბუნების, სიკეთის, თბილისზე და საქართველოზე გამორჩეულად შეყვარებული დამოკიდებულების გათვალისწინებით. სხვა არაფერი გვრჩება, დღეს რომ ვთქვათ, ბადრიზე ჩვენ ვამზადებთ მცირე ფილმს, რომელსაც წლის ბოლომდე ნახავს BMG-ს მაყურებელი, და ვეცდებით იმ ფილმში იყვნენ სწორედ ისინი, ვინც იმსახურებს საქმით და პიროვნულად მოხვედრას, რომ ყველაზე მეტად აღწეროს პატარკაციშვილის პიროვნება.

#ახალიამბები #BusinessMediaGeorgia