ფინანსთა სამინისტრომ ქონების გადასახადის რეფორმა გადაავადა და ის წელს არ განხორციელდება. შესაბამისად, იმ ფიზიკურმა პირებმა, რომელთა ოჯახის წლიური ერთობლივი შემოსავალი 40 000 ლარს აღემატება, ქონების გადასახადის დეკლარაცია არაუგვიანეს 1 ნოემბრისა უნდა წარადგინონ, ხოლო გადასახადი 15 ნოემბრამდე უნდა გადაიხადონ. ეს კი იმ ფონზე, რომ სამინისტრო შესაბამისი საკანონმდებლო ცვლილებების ინიციირებას პარლამენტში ჯერ კიდევ გასული წლის გაზაფხულზე გეგმავდა. ფინანსთა მინისტრის პირველი მოადგილის განცხადებით, ანალიზის შემდეგ გამოიკვეთა, რომ რეფორმის შედეგად მუნიციპალიტეტების ნაწილს შემოსავლები მნიშვნელოვნად ეზრდება, ნაწილს კი უმცირდება. შესაბამისად, მთავრობა ამ რეფორმის გატარებას არ ჩქარობს. სპეციალისტები კი მიუთითებენ, რომ ქონების გადასახადის რეფორმა, განსაკუთრებით ფიზიკური პირების ნაწილში, დასაჩქარებელია.

#ახალიამბები #BusinessMediaGeorgia