ეროვნულმა ბანკმა რეფინანსირების განაკვეთი 0.25 პროცენტული პუნქტით, 8,25%-მდე გაზარდა. სებ-ი ამ გადაწყვეტილებას ახლო აღმოსავლეთში დაწყებულ ომს და მისგან გამომდინარე ინფლაციურ წნეხს უკავშირებს და აცხადებს, რომ ეს ზომა პრევენციულ ხასიათს ატარებს, რომ ინფლაციური რისკების შემდგომი გადმოცემა ადგილობრივ ბაზარზე დაზღვეული იყოს. იმ შემთხვევაში, თუ ინფლაციური შოკები კიდევ უფრო გახანგრძლივდება, სები ამბობს, რომ მონეტარული პოლიტიკის განაკვეთის ზომიერი ზრდა გაგრძელდება. სპეციალისტების ნაწილი მონეტარული პოლიტიკის გამკაცრებას ელოდა და ამბობს, რომ ამ შემთხვევაში მარეგულირებელს სხვა არჩევანი არ ჰქონდა. ნაწილი კი მიიჩნევს, რომ მოცემულ ვითარებაში, როდესაც ინფლაციური წნეხი მიწოდების ფაქტორებიდან მოდის, ოპტიმალური გადაწყვეტილება განაკვეთის უცვლელად დატოვება იქნებოდა. რა არგუმენტებით გაამკაცრა ეროვნულმა ბანკმა მონეტარული პოლიტიკა და როგორია შეფასებები?


#ახალიამბები #BusinessMediaGeorgia