6 მლრდიანი ინვესტიციის კიდევ ერთი მხარეა, მისი გარემოსთან თავსებადობა. Eagle Hills-ის მიერ გამოქვეყნებული რენდერებიდან გაირკვა, რომ მილიარდიანი ინვესტიცია რუსთავი-თბილისის მაგისტრალის მიმდებარედ, სოფელ ფონიჭალასა და აღთაკლიაში მდებარე 590 ჰექტარის მიწის ნაკვეთზე უნდა განახორციელოს. ტერიტორია იმ მიწას მოიცავს, რომელსაც ამჟამად კრწანისის ტყე-პარკი ეწოდება. ის სახელმწიფო საკუთრებაშია, მის განმკარგავად კი სსიპ ველური ბუნების ეროვნული სააგენტოა მითითებული. ტყე-პარკს დაცული ტერიტორიის სტატუსი არ აქვს. შესაბამისად, აღნიშნული ფაქტორი ინვესტორისთვის მიწის გადაცემას ვერ შეაფერხებს.
აღნიშნული ინფორმაცია მწვავე კრიტიკის საგანი გახდა გარემოს დამცველების მხრიდან. სენის დირექტორის მოადგილე გავრცელებულ ინფორმაციას საგანგაშოდ აფასებს და ამბობს, რომ თუკი რეკრეაციულ ზონაში მშენებლობა მართლა დაიწყება, ამით ქვეყანა იმ ბიო მრავალფეროვან კუნძულს გაანადგურებს, რომლის შექმნისთვისაც ბოლო წლებში მილიონობით ლარი დაიხარჯა.
პროექტის რეალურად განხორციელების შემთხვევაში ქალაქის დანაკარგებზე საუბრობენ "ურბანული განვითარების ინსტიტუტში.“ ანი ბიბილაშვილი ამბობს, რომ ტყეში მშენებლობის დაწყება ვერცერთ სცენარში ვერ უპასუხებს გარემოს დაცვით გამოწვევებს და იმედს გამოთქვამენ, რომ ეს თემა დამატებითი კრიზისის შექმნის საფუძველი არ გახდება.