2017 წელს გაუქმებული კორუფციული სქემა ბრუნდება- ასე აფასებს „საერთაშორისო გამჭვირვალობა საქართველო“ მთავრობის ახალ ინიციატივას, რომელიც მაღალჩინოსნებისთვის პრემია-დანამატების დაბრუნებას მოიაზრებს.

TI-ის შეფასებით, ცვლილებები ქმნის გაუმჭვირვალე და უკონტროლო სისტემას, სადაც დამატებითი ანაზღაურების გაცემაზე გადაწყვეტილებას ხელმძღვანელი ერთპიროვნულად, კონკრეტული კრიტერიუმების გარეშე მიიღებს.

ორგანიზაციის განცხადებით, კანონპროექტის სრულად ამოქმედების შემთხვევაში, თანამდებობის პირებს წლიურად დამატებით 3.5 თვის ხელფასის ოდენობის თანხის მიღება შეეძლებათ. მათი გამოთვლებით, მაგალითად, თბილისის მერის მოადგილის ანაზღაურება 11 600 ლარიდან 15 080 ლარამდე გაიზრდება, ხოლო მერის პირველი მოადგილის12 000-დან 15 600 ლარამდე.

მმართველი გუნდი განმარტავს, რომ ცვლილებები დაკავშირებულია ზეგანაკვეთურ შრომასთან, დამატებითი ფუნქციების შესრულებასთან და განსაკუთრებულ სამუშაო პირობებთან. თუმცა, არასამთავრობო სექტორი მიიჩნევს, რომ მექანიზმი კორუფციის რისკებს ზრდის და საჯარო სექტორში ფინანსური წახალისების არათანაბარ და სუბიექტურ სისტემას აბრუნებს.

სტუმარი: გიგი ჩიხლაძე - "საერთაშორისო გამჭვირვალობა - საქართველო" ანალიტიკოსი;

#ახალიამბები #BusinessMediaGeorgia