„მაკდონალდს საქართველო“ გუნდის წევრების პროფესიულ განვითარებაზე, განათლებასა და მათ მოტივაციაზე ზრუნვას კვლავ აქტიურად განაგრძობს. ამის დასტურია ისიც, რომ კომპანიამ ახლახან „ბიზნესისა და ტექნოლოგიების უნივერსიტეტთან“ ურთიერთთანამშრომლობის მემორანდუმი გააფორმა, რაც დასაქმებულებისთვის განათლების ხელმისაწვდომობის გაზრდას და ახალი კარიერული შესაძლებლობების შექმნას ისახავს მიზნად. მასშტაბური პარტნიორობა „მაკდონალდსის“ ყველა თანამშრომელს აძლევს ექსკლუზიურ შესაძლებლობას, BTU-ს ბაზაზე მიიღოს ხარისხიანი განათლება, აიმაღლოს კვალიფიკაცია, მიიღოს წვდომა უახლეს ტექნოლოგიურ პროგრამებზე და დაეუფლოს თანამედროვე პროფესიებს. ვინაიდან გუნდის დიდ ნაწილს სტუდენტები წარმოადგენენ, პროექტის მთავარი აქცენტი სწორედ ახალგაზრდების კარიერულ მხარდაჭერაზე კეთდება. ამასთან, პარტნიორობის ერთ-ერთი მიმართულება ქალების ხელშეწყობაა.

„მაკდონალდს საქართველოში“ დასაქმებულთა 60%-მდე ქალია, შესაბამისად, კომპანიისთვის მნიშვნელოვანია მათი ჩართულობა ტექნოლოგიურ და ინოვაციურ საგანმანათლებლო პროგრამებში. მემორანდუმს ხელი „მაკდონალდს საქართველოს“ გენერალურმა დირექტორმა, თენგიზ კაპანაძემ და BTU-ს რექტორმა, ნინო ენუქიძემ მოაწერეს. მათი შეფასებით, კერძო სექტორსა და საგანმანათლებლო დაწესებულებებს შორის მსგავსი კოლაბორაცია მნიშვნელოვანი ნაბიჯია ქვეყნის ეკონომიკური განვითარებისა და კვალიფიციური კადრების მომზადებისთვის.

#ახალიამბები #BusinessMediaGeorgia