მაღალმთიან რეგიონებში მცხოვრები ახალგაზრდებისთვის განათლებაზე ხელმისაწვდომობის გაზრდის მიზნით, „ფილიპ მორის საქართველომ“ და „ცოდნის ფონდმა“ ერთობლივი სტუდენტური კონკურსი - „განათლება საზღვრების გარეშე“ წარმატებით დაასრულეს. პროექტში, რომელიც ემსახურებოდა სოციალური ინკლუზიურობის ზრდას და ისეთი ბარიერების დაძლევას, როგორებიცაა გეოგრაფიული მდებარეობა, ფინანსური თუ სოციალური მდგომარეობა, თბილისის თავისუფალი და აგრარული უნივერსიტეტების სტუდენტები მონაწილეობდნენ. ახალგაზრდების მთავარი ამოცანა საგანმანათლებლო პროცესის ხელშემწყობი ინოვაციური იდეებისა და ტექნოლოგიური გადაწყვეტების შექმნა იყო.კონკურსმა დიდი ინტერესი გამოიწვია: მასში თავდაპირველად 21 სამკაციანი გუნდი ჩაერთო. მეორე ეტაპზე საუკეთესო შედეგების მქონე 8 გუნდი გადავიდა, საიდანაც 3 ფინალისტი გამოვლინდა. 6 აპრილს გამართულ დასკვნით ღონისძიებაზე ჟიურიმ უკვე დაასახელა გამარჯვებული გუნდი. პროექტის ავტორები ჯილდოს სახით სწავლის ნაწილობრივ დაფინანსებას მიიღებენ, ამასთანავე, მათ გადაეცემათ ფინანსური რესურსი საკუთარი იდეის პრაქტიკაში განსახორციელებლად.


#ახალიამბები #BusinessMediaGeorgia