საქართველოში მოსული ნალექის გამო ქვეყნის მასშტაბით რამდენიმე საავტომობილო გზაზე დროებითი შეზღუდვები მოქმედებს. საავტომობილო გზების დეპარტამენტის ცნობით, ამ დროისთვის გადაადგილება შეზღუდულია საჩხერე–ჭიათურა–ზესტაფონის საავტომობილო გზაზე, სადაც მოძრაობა ეკრძალებათ მისაბმელიან და ნახევრად მისაბმელიან ავტოტრანსპორტს, დანარჩენი სახის ავტოტრანსპორტისთვის გადაადგილება თავისუფალია.

თოვისა და ლიპყინულის გამო, შეზღუდვა მოქმედებს ბორითის სატრანსპორტო კვანძსა და მცხეთა–სტეფანწმინდა–ლარსის საავტომობილო გზაზე, გუდაური – კობის მონაკვეთზე, სადაც ასევე შეზღუდულია მისაბმელიანი და ნახევრად მისაბმელიანი ავტოტრანსპორტის გადაადგილება.

რთული მეტეოროლოგიური პირობების გამო, დროებითი შეზღუდვები დაწესებულია საერთაშორისო მნიშვნელობის ხაშური–ახალციხე–ვალეს საავტომობილო გზის მონაკვეთზეც.

მეორე დღეა უხვთოვლიანობაა დედაქალაქშიც, სადაც თბილისის მერიის ცნობით გზები ინტენსიურად იწმინდება და იყრება ტექნიკური მარილი.
სამუშაოებში ჩართულია შპს „თბილსერვის ჯგუფის“ დაახლოებით 150 თანამშრომელი და შესაბამისი სპეცტექნიკა, რომლებიც 24-საათიან რეჟიმში საქმიანობენ.

როგორია დღეს დილისთვის ვითარება თბილისსა და მის შემოერთებულ ტერიტორიებზე?

ტუმარი: გიორგი პაპავა - „თბილსერვის ჯგუფის“ დირექტორი

#ახალიამბები #BusinessMediaGeorgia