ყველაზე საშობაო ქალაქში ვინაცვლებთ - ნიუ იორკში, ოღონდ ქართული სიამაყით და ჩვენებური ტრადიციებით. ქართული ნაციონალური ბალეტის 80-წლიან ისტორიაში პირველად, სუხიშვილები კონცერტს ნიუ-იორკში, მსოფლიოს ერთ-ერთ ყველაზე პრესტიჟულ სცენაზე, კარნეგი ჰოლში გამართავს. ისტორიული დებიუტი 2026 წლის 17 იანვარს შედგება და ქართული კულტურისთვის კიდევ ერთ გამორჩეულ თარიღად ჩაიწერება. საღამო ანსამბლის სრულფორმატიან წარმოდგენას მოიცავს, მათ შორის მაყურებელი სუხიშვილების ყველაზე აღიარებულ და საკულტო ნომრებს იხილავს. კარნეგი ჰოლის კონცერტს წინ უსწრებს ნიუ-იორკის პროგრამის ოფიციალური გახსნა - 16 იანვარს, როკფელერის ცენტრში. ეს იქნება კარნეგი ჰოლის საღამოს ოფიციალური დიპლომატიური და კულტურული პრე-მიღება, რომელიც სხვადასხვა სფეროს წარმომადგენლებს გააერთიანებს. ღონისძიებების ორგანიზატორია ამერიკაში დაფუძნებული კომპანია ემოლას ქორფორეიშენი, რომელიც ქართული ბიზნესის მხარდაჭერით, სუხიშვილების ორდღიან, დაუვიწყარ კულტურულ თავგადასავალს აანონსებს.


#ახალიამბები #BusinessMediaGeorgia