საგზაო მოძრაობის წესების რიგ დარღვევაზე ჯარიმები ორმაგდება - მათ შორის, სიჩქარის გადაჭარბებასა და მობილურის გამოყენებაზე - ამის შესახებ შსს-ოს მიერ შემუშავებულ საკანონდებლო ცვლილებათა პაკეტშია საუბარი, რომლის მიხედვითაც მიზანი საგზაო უსაფრთხოების მხრივ არსებული გამოწვევევების შემცირებაა.

უფრო კონკრეტულად 100 ლარამდე იზრდება ჯარიმა სატრანსპორტო საშუალების გზაზე მანევრირების წესების დარღვევისთვის. ამავდროულად, ქულთა რაოდენობა შეგიმცირდებათ 20 ქულით. 50-დან 100 ლარამდე იზრდება სანქცია 15 კმ/სთ-ზე მეტი, მაგრამ არაუმეტეს 40 კმ/სთ-ის სიჩქარის გადაჭარბებისთვის; 50 ლარამდე იზრდება სანქცია ავტომობილით მოძრაობისას მძღოლის ან მგზავრის მიერ უსაფრთხოების ღვედის გამოუყენებლობისთვის, ასეთ შემთხვევაში ქულათა რაოდენობა კი 10 ერთეულით შეგიმცირდებათ.

50 ლარამდე იზრდება სანქცია ავტომობილის მართვის დროს მძღოლის მიერ მობილურით სარგებლობისთვის; დგომა-გაჩერების წესების დარღვევისთვის თბილისის მსგავსად, 50 ლარამდე იზრდება ჯარიმის ოდენობა ქუთაისის, ბათუმის, მცხეთის, რუსთავის, გორის, თელავის, ფოთის, ზუგდიდის მუნიციპალიტეტებში და საქართველოს კურორტებზე.

დამატებით პასუხისმგებლობა დგინდება „BUS LANE“-ზე სამარშრუტო სატრანსპორტო საშუალების გარდა, სხვა სატრანსპორტო საშუალების მოძრაობის საპირისპირო მიმართულებით მოძრაობისთვის, რაც გამოიწვევს დაჯარიმებას 200 ლარის ოდენობით.

ასევე, ახალ სამართალდარღვევად განისაზღვრება სატრანსპორტო საშუალების ტროტუარზე ან ქვეითთა გადასასვლელზე დგომა-გაჩერება, რაც გამოიწვევს დაჯარიმებას 100 ლარის ოდენობით. ამავდროულად, ამ სამართალდარღვევის ჩადენის შემთხვევაში, კანონით განსაზღვრული პირობების არსებობისას, სატრანსპორტო საშუალება დაექვემდებარება სპეციალურ დაცულ სადგომზე გადაყვანას.

აღნიშნული საკანონმდებლო ცვლილებათა პაკეტი საქართველოს პარლამენტს უკვე წარედგინა. იქამდე კი გამოქვეყნდა 2025 წლის პირველ 9 თვეში ავტოსაგზაო შემთხვევევების მაჩვენებლები, რომელიც კვლავ საგანგაშოდ მაღალია.

9 თვეში საქართველოში 4 480 ავტოსაგზაო შემთხვევა აღირიცხა. ავტოავარიებს კი იანვრიდან სექტემბრამდე 345 ადამიანი ემსხვერპლა, 6 041 კი დაშავდა.



#ახალიამბები #BusinessMediaGeorgia