ფინანსთა სამინისტროს საგამოძიებო უწყების განცხადებით, სახელმწიფო უსაფრთხოების სამსახურთან კოორდინაციით ოპერატიულ-სამძებრო სამუშაოებს ატარებენ და განსაკუთრებულ ყურადღებას საკურორტო ზონებში მიწის მესაკუთრეების თუ უკანონო მშენებლობების საკითხს უთმობენ. ფინანსური პოლიციის განცხადებით, მკაცრი სასჯელი ემუქრებათ მათ, ვინც კურორტებსა თუ სხვა ადგილებში სახელმწიფოს კუთვნილი მიწების მისაკუთრებას და უკანონო მშენებლობებს დააპირებს.

ამ ნარატივის ფარგლებში გასული კვირის ბოლოს “კრისტალ ჯგუფის” ხელმძღვანელი ვლადიმერ სტეფანიანი დააკავეს. როგორც უწყებაში გამართულ ბრიფინგზე ითქვა, სტეფანიანის დაკავება დიდი ოდენობით უკანონო შემოსავლის ლეგალიზაციის ფაქტს ეხება. საგამოძიებო სამსახურის განცხადებითვე, მან დიდველზე ნებართვის გარეშე თვითნებურად ააშენა არც მეტი არც ნაკლები 5 სასტუმრო აპარტამენტი და მოაწყო კერძო სათხილამურო ტრასა.

გუშინ სტეფანიანს ბრალი ოფიციალურად წარუდგინეს. პროკურატურის განცხადებით, ბრალდებულის მიმართ აღკვეთის ღონისძიების სახით პატიმრობის შეფარდების მოთხოვნით სასამართლოს კანონით დადგენილ ვადაში მიმართავენ.

ერთ-ერთი მთავარი თემა და მინიმუმ კითხვები რაც ამ საკითხთან მიმართებით არსებობს ალბათ არის ის, რომ ყველა ამ ობიექტის გახსნაზე, ჩადიოდნენ მთავრობის წევრები და ერთად ზეიმობდნენ სამთო კურორტის განვითარებას. მათ შორის ბიზნესმენ სტეფანიანს იმ პროექტების შესრულებისთვისაც უხდიდნენ მადლობას, რომელიც იდეაში სახელმწიფოს გასაკეთებელი იყო.

მინიმუმ ძალიან უცნაურია, რომ ამ წლების განმავლობაში ის თურმე უკანონოდ აშენებდა პროექტებს და ამას ათეული წლის განმავლობაში ვერ ხედავდნენ ადგილზე ჩასული მაღალი თანამდებობის პირები. რატომღაც უცებ აღმოჩნდა, რომ მშენებლობები, რომელიც ობიექტურობისთვის უნდა ითქვას, რომ ყველაზე გამართულია ბაკურიანში, თურმე უკანონო იყო.

ვიდეო ჩანაწერი, რომელიც ახლა მინდა გაგიზიაროთ, ის 2023 წლის 11 თებერვლით თარიღდება. ის ასახავს ბიზნესმენის მორიგ წარმატებულად განხორციელებულ პროექტს, რომლის გახსნაზეც იმდროინდელი მთავრობის სრული შემადგენლობა იმყოფებოდა. მათ შორის უკვე დაჭერილებიც და დასაჭერად გამზადებულებიც.



#ახალიამბები #BusinessMediaGeorgia