სრულიად საქართველომ და არამარტო, მსოფლიომ იცის, რომ ცნობილი იტალიელი მოდის დიზაინერი ჯორჯო არმანი გარდაიცვალა. არმანი კომპანია Armani Group-ის ერთადერთი მეწილე იყო და იგი აქტიურად იღებდა ბრენდის მართვაში მონაწილეობას, ბოლო პერიოდში მუშაობდა არაერთ პროექტზე, მათ შორის მილანის მოდის კვირეულისთვის დაგეგმილ ღონისძიებაზე, რომელიც ბრენდის 50 წლის იუბილეს აღნიშნავდა. არმანის მიერ შექმნილი ბრენდი დღეს 10.5 მილიარდ აშშ დოლარად არის შეფასებული და იგი აერთიანებს ავეჯის, პარფიუმერიის მიმართულებას, ბარებს, რესტორნებს, სასტუმროებს და კალათბურთის კლუბ “ოლიმპია მილანოს”. იტალიის მოდის ისტორიაში უდავოდ ყველაზე წარმატებული დიზაინერი, ჯორჯო არმანი, გარკვეული დროის განმავლობაში ავადმყოფობდა და მის კარიერაში პირველად მიმდინარე წლის ივნისში იძულებული გახდა მილანში ჩატარებულ მამაკაცების მოდის ჩვენებაზე არ გამოსულიყო პუბლიკის წინაშე. ერთ-ერთი ყველაზე ცნობილი და გავლენიანი ბრენდი არმანი - წლიურად საშუალოდ ორ მილიარდზე მეტ შემოსავალს აფიქსირებს, მსოფლიოს მასშტაბით კი 8000 თანამშრომელს აერთიანებს.


#ახალიამბები #BusinessMediaGeorgia