საქართველოს დერეფანში ტრაილერების გატარებით მიღებული შემოსავალი შემცირდა. სახელმწიფო ხაზინის მონაცემებით, წელს 8 თვეში ბიუჯეტში გზათსარგებლობის გადასახადის სახით 110 605 237 ლარის შემოსავალი მიიღო, რაც წლიურად 6%-ით, ანუ 7.1 მლნ-ით შემცირებული მაჩვენებელია. მიღებული მონაცემები ცხადყოფს, რომ თუ შარშან ქვეყნის გზებით 336 402 ტრაილერმა გაიარა, წელს 316 015 ტრაილერის გატარება მოხდა, ეს 20 387 ტრაილერით ნაკლებია. მხოლოდ აგვისტოში ქვეყნის გზებით 38 956 სატვირთომ ისარგებლა, მათ მიერ ბიუჯეტში 13 634 838 ლარი შევიდა.

აღსანიშნავია, რომ წელს საქართველოზე გამავალ შუა დერეფანში სახმელეთო გადაზიდვები შემცირებულია როგორც სატვირთო ასევე სარკინიგზო მიმართულებით, თუმცა მარშრუტი გეოპოლიტიკური მდგომარეობის გათვალისწინებით აქტუალობას ისევ ინარჩუნებს. თიბისი კაპიტალის მიერ ცოტა ხნის წინ წარდგენილი კვლევაც აჩვენებს, რომ შუა დერეფანი სტრატეგიულია, თუმცა ალტერნატიულ დერეფნებთან შედარებით ნაკლებად კონკურენტულია გამტარუნარიანობის, დროისა და ხარჯების თვალსაზრისით. მთავარ გამოწვევად ინფრასტრუქტურის არასაკმარისი გამტარუნარიანობა და ადმინისტრაციული და საბაჟო პროცედურების სირთულე სახელდება. საინვესტიციო ბანკის ექსპერტები ფიქრობენ, რომ თუ დაწყებული და დაანონსებული პროექტები განხორციელდება ეს დერეფნის გამტარუნარიანობას გაზრდის.

რა ტენდენციებია შუა დერეფანში, რამდენად ახერხებს საქართველო არსებული ინფრასტრუქტურის გათვალისწინებით ტვირთების სრულფასოვან გატარებას და რა პერსპექტივები აქვს ქვეყანას?


სტუმარი: მიხეილ ნამადოვი - Kairos Logistics-ის გენერალური დირექტორი

#ახალიამბები #BusinessMediaGeorgia