საქართველოს პროკურატურამ თბილისში, ცეცხლსასროლი იარაღის მართლსაწინააღმდეგო ტარების ფაქტზე გიორგი რამიშვილს ბრალდება წარუდგინა. შს სამინისტროს ცნობით, თბილისის საერთაშორისო აეროპორტში შემოწმებისას მას თან იარაღი აღმოაჩნდა, რომელიც მის სახელზე იყო რეგისტრირებული, თუმცა არ გააჩნდა ამ იარაღის ტარების უფლება.
გამოძიებამ ამავე იარაღის ვაზნებიც აღმოაჩინა. პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით, სასამართლოს კანონით დადგენილ ვადაში მიმართავს.
ფაქტს 6 ივნის გვიან ღამით გამოეხმაურა სილქ როუდ ჯგუფი და განცხადებაში ნათქვამია, რომ გიორგი რამიშვილი საერთაშორისო აეროპორტში სასაზღვრო კონტროლის დროს დააკავეს, ვინაიდან ხელბარგში აღმოჩენილ იქნა კანონიერად შეძენილი, შენახვის უფლებით მასზე რეგისტრირებული ცეცხლსასროლი იარაღი.
დაინტერესებულ მხარეებს მოვუწოდებთ თავი შეიკავონ გადაუმოწმებელი ინფორმაციის გავრცელებისგან, ვინაიდან ამ ეტაპზე მიმდინარეობს შესაბამისი კანონმდებლობით გათვალისწინებული სამართლებრივი პროცედურები."- წერია განცხადებაში.
ბიზნესმენ გიორგი რამიშვილის ადვოკატის, ირმა ჭკადუას განცხადებით, რამიშვილის დაკავებას პოლიტიკასთან კავშირი არ აქვს. ჭკადუა მომხდარს „გაუთვალისწინებელ შეცდომად“ აფასებს და აღნიშნავს, რომ დეტალებზე მოგვიანებით ერთობლივი განცხადება გაკეთდება.

#ახალიამბები #BusinessMediaGeorgia