დღეს მასწავლებელთა ეროვნული ჯილდოს ფინალისტები დასახელდნენ. ხუთი ფინალისტიდან გამარჯვებული 5 ოქტომბერს მასწავლებლის მსოფლიო დღეს დასახელდება.
ფინალისტებს შორის არიან: ეკა წულუკიძე - მესტიის მუნიციპალიტეტის სოფელ ფარის საჯარო სკოლის ქართული ენისა და ლიტერატურის მასწავლებელი. ნათია ფურცელაძე - თბილისის კერძო სკოლა „ქორალის“ ქართული ენისა და ლიტერატურის მასწავლებელი. ნინო აბულაძე - თბილისის #43 საჯარო სკოლის ისტორიის მასწავლებელი. ვლადიმერ აფხაზავა - ლანჩხუთის მუნიციპალიტეტის სოფელ ჩიბათის საჯარო სკოლის სამოქალქო განათლების მასწავლებელი|სპეც.მასწავლებელი. თეა ნონიკაშვილი - გორის მუნიციპალიტეტი აიპ ღირსი მამა გიორგი მთაწმინდელის გორის გიმნაზიის ბიოლოგია ბუნებისმეტყველების მასწავლებელი.
„მასწავლებლის ეროვნული ჯილდო კოალიციის „განათლება ყველასათვის - საქართველო“ და მასწავლებელთა პროფესიული განვითარების ცენტრის ინიციატივით დაწესდა.
ცენტრის ეროვნული დირექტორის გიორგი მაჩაბელის თქმით, ჯილდოს დაწესების მიზანი წარმატებული მასწავლებლების გამოვლენა, საზოგადოებისთვის გაცნობა და პროფესიის პრესტიჟის გაზრდაა.
კონკურსში 114 მასწავლებელი მონაწილეობდა. გამარჯვებულს 10 000 ლარი გადაეცემა.