კოალიციის „განათლება ყველასათვის - საქართველო“ და მასწავლებელთა პროფესიული განვითარების ეროვნული ცენტრის წარმომადგენლები აჭარის რეგიონის მასწავლებლებს შეხვდნენ.

საინფორმაციო შეხვედრა ბათუმში იმერეთისა და სამეგრელოს შემდეგ მოეწყო.

შეხვედრაზე მასწავლებლებს დეტალურად გააცნეს კონკურსში მონაწილეობის წესები და მოთხოვნები.

ასევე, მათთვის ცნობილი გახდა საკონკურსო ეტაპების ვადები, რომლის მიხედვით, მასწავლებლები სპეციალურად შექმნილ სარეგისტრაციო ვებგვერდზე - www.tprize.ge 14 ივლისამდე შეძლებენ აპლიკაციების შევსებას.

მასწავლებელთა ეროვნული ჯილდოსთვის შექმნილი 10-კაციანი ჟიური თავდაპირველად 10 კანდიდატს შეარჩევს, ხოლო მოგვიანებით 5 ფინალისტს გამოავლენს.

გამარჯვებული მასწავლებელი 5 ოქტომბერს, მასწავლებლის საერთაშორისო დღეს დასახელდება.

„მასწავლებელთა ეროვნული ჯილდო“ კოალიცია „განათლება ყველასთვის-საქართველოს“, მასწავლებელთა პროფესიული განვითარების ეროვნული ცენტრისა და განათლებისა და მეცნიერების სამინისტროს შორის გაფორმებული მემორანდუმის საფუძველზე წელს 13 მაისს დაწესდა.