მიანმარის ხელისუფლებამ რაკჰაინის შტატის მცხოვრებლებისთვის გაერო-ს ჰუმანიტარული დახმარების მიწოდება დაბლოკა.
ინფორმაციას ბრიტანული „გარდიანი“ ავრცელებს.
ხელისუფლების ცნობით, რეგიონში დაზარალებული მოსახლეობისათვის დახმარების ჩატანა უსაფრთხოების კუთხით შექმნილი რთული ვითარების გამო აკრძალეს.
როგორც მთავრობა ამტკიცებს, აღნიშნულ შტატში სამხედროები მუსლიმი როჰინჯას თემის წარმომადგენელ მებრძოლებს ებრძვიან. თუმცა თავად ადგილობრივი მოსახლეობა ამტკიცებს, რომ სამხედროები მათ თავს ესხმიან, ხოცავენ და სახლებს უწვავენ.
კონფლიქტის გამო, სხვადასხვა ცნობებით, 400-ზე მეტი ადამიანი მოკლეს. შტატის ტერიტორია 90 ათასზე მეტმა როჰინჯამ დატოვა.
მიანმარში როჰინჯებს ბანგლადეშიდან გადმოსახლებულ მიგრანტებად მიიჩნევენ, ამის გამო მათ უმრავლესობას მიანმარსი მოქალაქეობას არ აძლევენ. მიანმარის ბუდისტ მოსახლეობასა და როჰინჯებს შორის კონფლიქტი წლებია გრძელდება.