მიანმარის დე ფაქტო ლიდერის, აუ სან სუ ჩის განცხადებით, რაკჰაინის შტატში ყველა ადამიანი დაცულია.
ამასთან ერთად ნობელის პრემიის მფლობელი ამბობს, რომ მედია შტატში არსებული ვითარების და კონფლიქტის შესახებ უამრავ დეზინფორმაციას ავრცელებს, რაც მხოლოდ ტერორისტების ინტერესებს ემსახურება. აუ სან სუჩიმ ეს კომენატარი თურქეთის პრეზიდენტთან სატელეფონო საუბრისას გააკეთა.
25 აგვისტოდან დღემდე მიანმარის რაკჰაინის შტატში ვითარება დაძაბულია. ამის მიზეზი ექსტრემისტების მიერ პოლიციელების საკონტროლო გამშვებ პუნქტებზე მოწყობილი თავდასხმა გახდა.
სამხედროების საპასუხო იერიშის დროს ოფიციალური ცნობებით, 400 ადამიანი დაიღუპა. ხელისუფლების ცნობით, მათი უმრავლესობა რადიკალი ისლამისტი იყო. თუმცა როგორც ადგილობრივები ყვებიან, სამხედროებმა მშვიდობიანი მოქალაქეები მოკლეს და სოფლების გადაწვეს. ამის გამო მიანმარიდან ბანგლადეშში 123 ათასი მუსლიმი როჰინჯა გაიქცა.
პარალელურად სააგენტო "როიტერისთვის" ცნობილი ხდება, რომ მიანმარის ხელისუფლებამ ბანგლადეშის საზღვარზე ნაღმები დაამონტაჟა, რათა მეზობელ ქვეყანაში გაქცეული როჰინჯების უკან დაბრუნებას ხელი შეუშალოს.
მინმარის მთავრობა როჰინჯებს ბანგლადეშიდან გადმოსახლებულ ლტოლვილებად მიიჩნევს, რის გამოც მათ მოქალაქეობას არ აძლევს. რაკჰაინის შტატში ბუდისტებსა და მუსლიმ როჰინჯებს შორის კონფლიქტი უკვე წლებია არსებობს და არაერთხელ გახდა ძალადობის ესკალაციის მიზეზი.