სახალხო დამცველმა, უჩა ნანუაშვილმა ემრე ჩაბუქისთვის ლტოლვილის სტატუსის არმინიჭების საკითხზე ჟურნალისტებთან ისაუბრა. მისი თქმით, მსგავსი გადაწყვეტილება უფრო მეტად უნდა იყოს დასაბუთებული. ასევე, განსაკუთრებით უნდა იყოს გათვალისწინებული ის უახლოესი ინფორმაცია, რომელიც წარმოშობის ქვეყანაში ადამიანის უფლებათა მდგომარეობის კუთხით არსებობს.
„სამწუხაროდ, გადაწყვეტილბა მხოლოდ რამდენიმე წლის წინანდელ ინფორმაციაზე დაყრდნობით არის მიღებული. ამიტომ მნიშვნელოვანია, აქცენტები ბოლო ერთი წლის განმავლობაში მომხდარ პროცესებზე იყოს გაკეთებული. რამდენიმე გარემოება განსაკუთრებულად უნდა იყოს გათვალისწინებული. მაგალითად, თურქეთში არაადამიანური მოპყრობის და წამების გახშირებულ ფაქტებთან დაკავშირებით გარკვეული კითხვის ნიშნები არსებობს და ამაზე არაერთმა ორგანიზაციამ უკვე გააკეთა კონკრეტული განცხადება. სამწუხაროდ ეს რისკები სამინისტრომ არ გაითვალისწინა და ის დაეყრდნო უფრო წინანდელ ინფორმაციას. შესაბამისად, მე გარკვეული შენიშვნები მაქვს ამ საკითხთან დაკავშირებით, რომელზეც მოგვიანებით, უფრო დეტალურად ვისაუბრებ“, - განაცხადა ნანუაშვილმა.