თურქული მხარის მოთხოვნის შესაბამისად, საქართველოში დაკავებული დემირელის კოლეჯის მენეჯერის მუსტაფა ემრე ჩაბუქის ადვოკატი სოსო ბარათაშვილი ითხოვს, დაკავებულს ლტოლვილის სტატუსი მიენიჭოს.

ამის შესახებ მან სახალხო დამცველის წარმომადგენლებთან და არასამთავრობოებთან შეხვედრის დროს განაცხადა.

„მივმართავთ ლტოლვილთა და განსახლების სამინისტროს, მიანიჭოს მუსტაფა ემრე ჩაბუქს ლტოლვილის სტატუსი“, - განაცხადა სოსო ბარათაშვილმა.

ჩაბუქის ადვოკატები განმარტავენ, რომ ლტოლვილის სტატუსი ჩაბუქის ექსტრადირების პროცესს შეაჩერებს.

ადვოკატები ექსტრადირებას დაუშვებლად მიიჩნევენ, რადგან მათი განცხადებით ჩაბუქის ტერორიზმთან კავშირი აბსურდია და საქმეში შესაბამისი მტკიცებულებები არ არსებობს.

Amnesty International მიიჩნევს, რომ თურქეთში ჩაბუქი, შესაძლოა, წამების, სასტიკი, არაადამიანური და ღირსების შემლახავი მოპყრობის ან ადამიანის უფლებათა სხვა სერიოზული დარღვევების მსხვერპლი გახდეს. შესაბამისად, Amnesty International მოუწოდებს საქართველოს, არ გადასცეს დაკავებული ჩაბუქი თურქეთს.

მუსტაფა ემრე ჩაბუქს წინასაექსტრადიციო 3-თვიანი პატიმრობა შეეფარდა. თურქული მხარე მას ტერორისტულ ორგანიზაციასთან თანამშრომლობას ედავება.