ნაციონალურ საკალათბურთო ასოციაციაში გრძელდება პლეი-ოფის პირველი რაუნდი.
დასავლეთ კონფერენციის ნახევარფინალთან საკმაოდ ახლოსაა ჰიუსტონ როკეტსი. ტეხასური გუნდი ოკლაჰომა სითი თანდერს საერთო სერიას უკვე 3:1-ს უგებს. ამ წყვილის მეოთხე მატჩი, გუშინ, ოკლაჰომას ჩისპეიკ არენაზე შედგა და სტუმართა გამარჯვებით, ანგარიშით 113-109 დასრულდა. თამაში ბოლო წამებამდე დაძაბული გამოდგა. როკეტსს ბრაზილიელმა ცენტრმა ნენე ილარიომ ულიდერა, 28 ქულით და 10 მოხსნით.
მორიგი შთამბეჭდავი სტატისტიკა ჰქონდა რასელ უესტბრუკს. ოქეისის უკანახაზელმა კიდევ ერთი სამმაგი დუბლი დააფიქსირა: 35 ქულა 14 მოხსნა და 14 ზუსტი პასი. ამ გუნდების სერიის მეხუთე თამაში, ზეგ, ჰიუსტონის ტოიოტა ცენტრში გაიმართება და მასპინძლები გამარჯვების შემთხვევაში შემდგომი ეტაპის საგზურს მოიპოვებენ.