ესპანეთში ქვეყნის სამეფო თასის გათამაშების ორი მეოთხედფინალური შეხვედრა გაიმართა. სან სებასტიანში მოიგო "ბარსელონამ", რომელმაც "რეალ სოსიედადს" მინიმალური სხვაობით 1-0 მოუგო.

თამაშის ერთადერთი გოლი 21-ე წუთზე, თერთმეტმეტრიანი დარტყმით, ბრაზილიელმა ნეიმარმა გაიტანა.

აღსანიშნავია, რომ "ბარსელონას" ანოეტას სტადიონზე, აქამდე ზედიზედ რვა შეხვედრა არ ჰქონდა მოგებული.

წყვილის საპასუხო თამაში 26 იანვარს ნოუ კამპზე შედგება.

დამაჯერებელ გამარჯვებას მიაღწია გათამაშების კიდევ ერთმა ფავორიტმა, მადრიდის "ატლეტიკომ". დიეგო სიმეონეს გუნდმა საკუთარ ვისენტე კალდერონზე "ეიბარი" დიდი ანგარიშით 3-0 დაამარცხა.

მასპინძლებმა პირველი ტაიმი ანტუან გრიზმანის გოლით მოიგეს. მეორე ნახევარში მადრიდელებმა კიდევ ორჯერ აიღეს მეტოქის კარი, მესამოცე წუთზე, თავი ანხელ კორეამ გამოიჩინა, ხოლო საბოლოო წერტილი კევინ გამეირომ დასვა.

ამ წყვილის განმეორებითი მატჩი, რომელიც ეიბარის სტადიონზე, 25 იანვარს შედგება, დიდი ალბათობით ფორმალობა იქნება.