1-ელი მაისიდან „შრომითი მიგრაციის შესახებ“ საქართველოს კანონში მნიშვნელოვანი ცვლილებები ამოქმედდა, რომლის მიხედვითაც მუდმივი ბინადრობის ნებართვის არმქონე უცხოელებს გიდად, კურიერად და ტაქსის მძღოლად მუშაობა აეკრძალათ. ამ სფეროებზე სახელმწიფომ ნულოვანი კვოტა დააწესა, რაც პრაქტიკულად მათ ჩაკეტვას ნიშნავს. კანონის დარღვევა ითვალისწინებს ფინანსურ სანქციებს როგორც კომპანიებისთვის, ისე თავად უცხოელი დასაქმებულებისთვის. მიუხედავად რეგულაციების ამოქმედებისა, სექტორში აღსრულების სერიოზულ პრობლემაზე საუბრობენ. როგორც ირკვევა, კანონის აღსრულებაზე პასუხისმგებელი შრომის ინსპექციაა, თუმცა რეალური და ქმედითი ნაბიჯები ჯერ არ გადადგმულა. შესაბამისად, უცხოელი გიდები კვლავ შეუფერხებლად აგრძელებენ საქმიანობას. სფეროს წარმომადგენლები მიიჩნევენ, რომ სანამ კონკრეტული პირები არ დაჯარიმდებიან, კანონის არსებობას აზრი ეკარგება. რაც შეეხება სამომავლოდ კვოტების შესაძლო გადახედვას, სპეციალისტები აცხადებენ, რომ ამისთვის აუცილებელია ბაზრის დეტალური კვლევა, რათა გამოვლინდეს, რეალურად არსებობს თუ არა კონკრეტულ ენებზე (მაგალითად, ჩინურზე) ადგილობრივი კადრების დეფიციტი.

სტუმარი: ელზა ბებია - “სერტიფიცირებული გიდების ასოციაცია”, პრეზიდენტი

#ქალებისნარატივი მარიამ იზორიასთან ერთად


#ახალიამბები #BusinessMediaGeorgia