#ახალიამბებიინდონეზიის დედაქალაქ ჯაკარტასთან ახლოს ორი მატარებლისა და ტაქსის მონაწილეობით ავარია მოხდა. საგანგებო სიტუაციის შედეგად, 14 ადამიანი დაიღუპა და 84 დაშავდა,- ინფორმაციას Reuters-ი ავრცელებს.

ორშაბათს, გვიან ღამით, ჯაკარტასთან ახლოს, ბეკაშიში, სამგზავრო მატარებელსა და საქალაქთაშორისო მატარებელს შორის შეჯახება მოხდა. გაირკვა, რომ სამგზავრო მატარებელი ჯერ ლიანდაგზე მყოფ ტაქსს შეეჯახა, შემდეგ კი საქალაქთაშორისო მატარებელს.

რკინიგზის ოპერატორმა დღეს დილით განაცხადა, რომ მაშველებმა ნანგრევების ქვეშ მოყოლილი ადამიანების ამოყვანა დაასრულეს.

ინდონეზიის სამძებრო-სამაშველო სააგენტოს ხელმძღვანელმა, მოჰამედ სიაფიიმ, განაცხადა, რომ ავარიის შედეგად ყველაზე მეტი დარტყმა მხოლოდ ქალებისთვის განკუთვნილმა მატარებლის ვაგონმა მიიღო. შესაბამისად, ყველა მსხვერპლი ქალი იყო და მათი უმეტესობა ლითონის ნამსხვრევების ქვეშ იყო მოქცეული.

ბეკაშის საავადმყოფოს მონახულების შემდეგ, პრეზიდენტმა პრაბოვო სუბიანტომ განაცხადა, რომ დათანხმდა რკინიგზის ლიანდაგთან ახლოს ესტაკადის აშენებას, რათა შემსუბუქებულიყო საგზაო მოძრაობის საცობები და დასძინა, რომ ხელისუფლება შეტაკებებს გამოიძიებს. მან ასევე განაცხადა, რომ რკინიგზის ქსელის მნიშვნელოვანი ნაწილები სათანადოდ არ არის მოვლილი.

ავარიას ინდონეზიის ეროვნული სატრანსპორტო უსაფრთხოების კომიტეტი (KNKT) გამოიძიებს.