ეკონომიკის სამინისტრომ მზის და ქარის ელექტროსადგურების მემორანდუმების გაცემა დროებით შეაჩერა. კერძო სექტორის წარმომადგენლების ინფორმაციით, გადაწყვეტილება განპირობებულია იმით, რომ ქსელთან მიერთებაზე მოთხოვნა იმაზე მეტია, ვიდრე ენერგოსისტემას ენერგიის ათვისება შეუძლია. უწყება შიშობს, რომ გარკვეულ პერიოდებში, მაგალითად გაზაფხულზე, როდესაც ჰესების, მზის და ქარის მიწოდება პიკზეა, ენერგიის ისეთი სიჭარბე წარმოიშვება, რომლის ექსპორტზე გატანა ან სისტემაში დატოვება ვერ მოხერხდება. შესაბამისად, სამინისტრომ სექტორს პრიორიტეტულობის ახალი გეგმა შესთავაზა - თუ რომელი სადგური უნდა გაითიშოს სისტემიდან პირველ რიგში ჭარბი ენერგიის წარმოქმნის შემთხვევაში. ეკონომიკის სამინისტრო განიხილავს, რომ პირველ რიგში სიმძლავრე უნდა შეუმცირდეს ან გაითიშოს მზის ელექტროსადგურები, შემდეგ - ქარის სადგურები, ბოლოს კი - ჰესები.

#ახალიამბები #BusinessMediaGeorgia