წელს ფერმერები მასშტაბური ცვლილებებისთვის ემზადებიან - საირიგაციო წყალზე წვდომა ძვირდება და ამასთან, წყლის მისაღებად მათ მელიორაციის კომპანიასთან განრიგის წინასწარი შეთანხმება ხდება სავალდებულო. შედეგად, თებერვლიდან 2027 წლის იანვრის ჩათვლით, „საქართველოს მელიორაცია“ წყლის მიწოდებას შეთანხმებული და დამტკიცებული რეჟიმით განახორციელებს. ფერმერებმა ხელშეკრულებების გაფორმება კი, თებერვალ- მარტში უნდა დაასრულონ. 1 აპრილიდან ფერმერებისთვის წყლის მოხმარებაზე ახალი ტარიფები ამოქმედდება. კერძოდ, თუ აქამდე 1 ჰექტარზე საირიგაციო წყლის გადასახადი აღმოსავლეთ საქართველოში 75 ლარს, დასავლეთში კი 45 ლარს შეადგენდა, ახლა ტარიფი იზრდება, დიფერენცირებული ხდება და ამასთან, მორწყვის სიხშირეზე იქნება დამოკიდებული. კერძოდ, ერთწლოვან კულტურებზე გაუმრიცხველიანებელი მომხმარებლებისთვის 1 ჰა-ზე მორწყვის გადასახადი დღგ-ს ჩათვლით 116 ლარი იქნება, მრავალწლოვანზე კი, 102 ლარი. თუ გავითვალისწინებთ, რომ ფერმერს მოსავლის რამდენჯერმე მორწყვა დასჭირდება, ეს იმას ნიშნავს, რომ ირიგაციის ხარჯი ყოველ ჰექტარზე რამდენიმე ასეული ლარი იქნება. სემეკმა ირიგაციის ტარიფები გამრიცხველიანებული მომხმარებლებისთვისაც დაადგინა. კერძოდ, წყალმომხმარებელთა ორგანიზაციაში გაერთიანებული იმ ფერმერებისთვის, რომლებიც საფასურს მრიცხველის შესაბამისად იხდიან, წყლის მიწოდების ტარიფი 1 კუბ. მეტრზე 3.5 თეთრს შეადგენს, მაშინ როდესაც ინდივიდუალური ფერმერებისთვის ტარიფი 8 თეთრით განისაზღვრა. რა იციან ფერმერებმა ახალ წესებზე და როგორ აისახება მორწყვის ტარიფის ზრდა საბოლოო პროდუქტზე?

სტუმარი: ილია კუნჭულია - საქართველოს ფერმერთა ასოციაციის სერტიფიცირების სპეციალისტი

#ახალიამბები #BusinessMediaGeorgia