იაპონიაში, მსოფლიოში ცნობილ ტოიოსუს თევზის ბაზრობაზე 5 იანვარს, 243-კილოგრამიანი ლურჯფარფლიანი თინუსი რეკორდულ $3,2 მილიონად გაიყიდა. წლის პირველი თევზის აუქციონი ტოკიოში ყოველ 5 იანვარს იმართება და აუქციონზე გამოტანილი პირველი თინუსი ყოველთვის ყველაზე მაღალი ხარისხისაა, ე.წ. Ichiban-maguro.ძვირად ღირებული თევზი ჩრდილოეთ იაპონიაში, ომას სანაპიროსთან დაიჭირეს. ეს რეგიონი ქვეყნის საუკეთესო თინუსის წარმოებითაა ცნობილი, აქ დაჭერილი თინუსის ფასი კილოგრამზე 2,1 მილიონი იენია, რაც 13 360 აშშ დოლარს უდრის. აუქციონი ამ ჯერზეც Kiyomura Corp.-მა მოიგო, რომლის მფლობელიც “თინუსის მეფედ” ცნობილი კიოში კიმურაა. კომპანია ადგილობრივ ბაზარზე სუში რესტორნების ქსელს - Sushi Zanmai-ს ფლობს.კიმურა აუქციონებში რეგულარულად მონაწილეობს, მასვე ეკუთვნის ბაზარზე 2019 წელს დაფიქსირებული რეკორდი, როდესაც აუქციონზე თევზი $2.1 მილიონად გაიყიდა.კიმურასთვის აუქციონზე საუკეთესო თინუსის შეძენა და წლის დასაწყისში თავის რესტორნებში მისი შეთავაზება ერთგვარი რიტუალია, იგი თვლის, რომ თევზი ხალხისთვის იღბლის მომტანია.

#ახალიამბები #BusinessMediaGeorgia