ჯანდაცვის სამინისტროს თქმით, ფსიქოტროპული მედიკამენტების რეფორმის პროცესში, მნიშვნელოვანი დარღვევები გამოიკვეთა. უწყების ინფორმაციით, ჩატარებულმა ანალიზმა აჩვენა, რომ კერძო იმპორტიორები მედიკამენტებს 30%-დან 810%-მდე ფასნამატით ყიდდნენ, რასაც დამატებით ემატებოდა საცალო სააფთიაქო ქსელების ფასიც. შედეგად, რიგ პრეპარატებზე ფასი „რეალურ ღირებულებასთან შედარებით 10-ჯერ მაღალი“ იყო.

სამინისტროში აცხადებენ, რომ მას შემდეგ, რაც სპეციალურ კონტროლს დაქვემდებარებული ფარმაცევტული პროდუქციის იმპორტი სახელმწიფომ გადაიბარა, წამლების ნაწილი 10-ჯერ გაიაფდა. უკვე დაფიქსირებულია შესაბამისი სამედიცინო დაწესებულებების მომარაგება, ხოლო სააფთიაქო ქსელებში მარაგების შევსება ეტაპობრივად მიმდინარეობს. რაც შეეხება მოხმარებას, მის უზრუნველსაყოფად მიმდინარეობს მკაცრი კონტროლი.

ფარმაცევტული სექტორის მონიტორინგის შედეგებზე პარლამენტში ისაუბრა კონკურენციისა და მომხმარებლის დაცვის სააგენტოს თავმჯდომარემაც. ირაკლი ლექვინაძის თქმით კომპანიების მიერ წარმოდგენილ ხარჯთაღრიცხვებში დაფიქსირდა ისეთი ხარჯები, რომლებიც არაკორექტულად ზრდიდა წამლის საბითუმო ფასებს.

საუბარია ისეთ ხარჯებზე, როგორიცაა ძვირად ღირებული სამკაული, საქართველოში და უცხოეთში ფეშენებელურ სასტუმროებში კონფერენციების ორგანიზება და განთავსება, ასევე ძვირად ღირებული ავტომობილების შეძენისა და ექსპლუატაციის ხარჯები.

რა შეცვალა რეფერენტულმა ფასებმა ფარმაცევტულ ბაზარზე და რა გამოწვევებია დღის წესრიგში?

სტუმარი: ვატო სურგულაძე - ჯანდაცვის მენეჯმენტის სპეციალისტი

#ახალიამბები #BusinessMediaGeorgia