საქართველო უზბეკეთს შორის სავაჭრო-ეკონომიკური კავშირები მზარდია. ამ დროისთვის უზბეკეთი საქართველოს მეცხრე უმსხვილესი საექსპორტო ბაზარია, სადაც 2025 წლის 8 თვეში ექსპორტი 55.9%-ით გაიზარდა და 126.3 მლნ დოლარი შეადგინა. მასზე ქვეყნის მთლიანი ექსპორტის 2.8% მოდის. უზბეკეთი იმ გამონაკლის ქვეყნებს შორისაა, რომლებთანაც საქართველოს დადებითი სავაჭრო ბალანსი აქვს, ანუ თავად იმაზე მეტს ყიდის ამ ბაზარზე, ვიდრე ყიდულობს. აღსანიშნავია, რომ ექსპორტის დიდი წილი, 70%-ზე მეტი რეექსპორტზე მოდის. უზბეკეთთან სავაჭრო ბრუნვა 2021 წლიდან მზარდია, 2024 წელს კი რეკორდულ 242.3 მლნ დოლარს მიაღწია. მიმდინარე წლის 8 თვეში ექსპორტი და იმპორტი ჯამურად 181.4 მლნ დოლარი იყო. ორ ქვეყანას შორის ეკონომიკური კავშირების კიდევ ერთი მიმართულება ტურიზმია. 9 თვის მონაცემებით, უზბეკეთი Top 15 ქვეყანას შორისაა, საიდანაც საქართველოში ყველაზე მეტი ვიზიტი შედგა. კერძოდ, რაოდენობამ 61 949 შეადგინა, რაც წლის ჭრილში თითქმის 23%-იანი ზრდაა. რა განაპირობებს ორ ქვეყანას შორის გაზრდილ სავაჭრო-ეკონომიკურ კავშირებს და როგორია ზრდის პოტენციალი, განსაკუთრებით იმ ფონზე, რომ ბოლო წლებში არაერთი ქართული კომპანია გავიდა უზბეკეთის ბაზარზე - ამ თემებზე უზბეკეთში საქართველოს ელჩთან, დავით კოტარიასთან ინტერვიუ ჩვენმა გადამღებმა ჯგუფმა გასულ კვირას ტაშკენტში, გაყიდვების ასოციაციის მიერ ორგანიზებული საქართველო-უზბეკეთის ბიზნეს გამოფენის ფარგლებში ჩაწერა.

ინტერვიუ: დავით კოტარია - საქართველოს ელჩი უზბეკეთში

#ახალიამბები #BusinessMediaGeorgia