ნორვეგიის ნობელის კომიტეტმა მშვიდობის დარგში ნობელის პრემიის ლაურეატი დაასახელა. 2025 წელს ეს ჯილდო მარია კორინა მაჩადოს ერგო. ოფიციალურ ვებ-გვერდზე გამოქვეყნებული პრეს-რელიზის თანახმად, მას ჯილდო ვენესუელ მოსახლეობის დემოკრატიული უფლებების დაუღალავი დაცვისა და დიქტატურიდან დემოკრატიულ მართვის მოდელზე ქვეყნის მშვიდობიანი და სამართლიანი გადაყვანისთვის ბრძოლაში გადაეცა. რაც შეეხება თავად მაჩადოს, ის არის ვენესუელელი პოლიტიკოსი და ადგილობრივი ოპოზიციის აქტიური ლიდერი, რომელიც 2011-2014 წლებში ქვეყნის საკანონმდებლო ორგანოს დეპუტატიც იყო. მაჩადო პოლიტიკაში 2002 წელს მოვიდა და ათ წელიწადში საპრეზიდენტო არჩევნებში მონაწილეობაც სცადა, თუმცა შიდა-პარტიულ არჩევნებში ენრიკე კაპრილესთან დამარცხდა. ვენესუელელი პოლიტიკოსი აქტიურ მონაწილეობას იღებდა 2014 წლის ანტისამთავრობო გამოსვლებში. 2023 წელს მაჩადომ ხელახლა სცადა საპრეზიდენტო არჩევნებში მონაწილეობა, თუმცა ვენესუელას უზენაესმა სასამართლომ მას კანდიდატურის დაყენების უფლება არ მისცა. ცნობისთვის, ნობელის მშვიდობის პრემიის მიღება განსაკუთრებულად ამერიკის 47-ე პრეზიდენტს, დონალდ ტრამპს სურდა, რომელმაც ინტერესი არაერთხელ გამოხატა. შტატების ლიდერი მოელოდა, რომ მას ჯილდო მსოფლიოს მასშტაბით მიმდინარე არაერთი ომის გაჩერებისა და დაპირისპირებულ მხარეებს შორის შუამავლობისთვის გადაეცემოდა. ეს მოლოდინი განსაკუთრებით მას შემდეგ გაჩნდა, რაც ტრამპის სამშვიდობო შეთანხმების პირველ ფაზაზე ისრაელმა და ჰამასმა შეთანხმებას მიაღწიეს. ისიც ფაქტია, რომ წლევანდელ გამარჯვებულად ნობელის პრემიის ყველაზე პრესტიჟულ ჯილდოზე დასახელდა ადამიანი რომლის პიროვნებასაც, თავად ამერიკის პრეზიდენტიც კი ვერ გააკრიტიკებს, მეტიც შეგახსენებთ, ნობელის მშვიდობის პრემია 1901 წლიდან გაიცემა და მისი არსებობის 124-წლიანი ისტორიის მანძილზე, ის 105-ჯერ გაიცა. დასახელებული 124 ლაურეატიდან ყველაზე მეტი - 45%, წარმოშობით ევროპიდანაა, ყველაზე ცოტა გამარჯვებული კი სამხრეთ ამერიკიდანაა, სადაც მშვიდობის დარგში ნობელის პრემია მხოლოდ 3 ადამიანს ერგო.


#ახალიამბები #BusinessMediaGeorgia