მოსახლეობის საყოველთაო აღწერის წინასწარი შედეგებით, 2024 წლის 14 ნოემბრის მდგომარეობით, საქართველოს მოსახლეობის რიცხოვნობამ 3 914 000 კაცი შეადგინა. 2014 წლის საყოველთაო აღწერის შედეგად კი, მოსახლეობის რაოდენობა 3 713 804 იყო, რაც იმას ნიშნავს, რომ ბოლო ათ წელში საქართველოს მოსახლეობა დაახლოებით 200 000-ითაა გაზრდილი. გამოქვეყნებულმა შედეგებმა აზრთა სხვადასხვაობა გამოიწვია და საზოგადოების ნაწილში კითხვებიც გაჩნდა. საქსტატის აღმასრულებელმა დირექტორმა დამატებითი განმარტებაც გააკეთა, გოგიტა თოდრაძის თქმით, ეს წარმოადგენს ქვეყანაში მუდმივად მცხოვრები მოსახლეობის რიცხოვნობას და შესაბამისად, მასში, ქვეყანაში მოკლე ვადით მყოფი უცხო ქვეყნის მოქალაქეები არ შედიან. ის განმარტავს, რომ აღწერას დაექვემდებარა ქვეყანაში მუდმივად მცხოვრები საქართველოს ყველა მოქალაქე და ასევე, ქვეყნის ტერიტორიაზე მყოფი უცხო ქვეყნის მოქალაქეები და მოქალაქეობის არმქონე პირები, რომლებიც საქართველოში დარჩენას გეგმავდნენ 12 თვეზე მეტხანს, თუმცა საქსტატმა საქართველოს მოსახლეობად ჩათვალა მხოლოდ ქვეყანაში მუდმივად მცხოვრები საქართველოს მოქალაქეები და ის უცხოელები, რომლებიც აღწერის დროს ქვეყანაში იმყოფებოდნენ 1 წლის და მეტი ხნის განმავლობაში. საქსტატის აღმასრულებელმა დირექტორმა ასევე განმარტა, რომ მოსახლეობის აღწერის მეთოდოლოგია არ შეცვლილა და შარშანაც იმ კრიტერიუმებით იხელმძღვანელეს, როგორც - 2014 წელს.

სტუმარი: გოგიტა თოდრაძე - „საქსტატის“ აღმასრულებელი დირექტორი

#ახალიამბები #BusinessMediaGeorgia