რამდენიმე დღის წინ ავჭალის დასახლებაში, ლიფტის შახტში ჩავარდნას 13 წლის ბიჭის სიცოცხლე ემსხვერპლა. უბედური შემთხვევა ე.წ. ტიტანიკის სახელით ცნობილ კორპუსში მოხდა, რომელიც ავარიულია და როგორც თბილისის მერიაში განმარტეს მასში ლიფტი მოწყობილი არასდროს ყოფილა.

ლიფტი ჩავარდა ორიოდე კვირის წინ კი დიდუბეში, მირცხულავას ქუჩაზე ახლადაშენებულ მაღალსართულიან კორპუსში სადაც 5 ადამიანი იმყოფებოდა. საბედნიეროდ სათადარიგო მუხრუჭის მუშაობის ხარჯზე 22-ე სართულიდან დაწყებულ ავარიულ მოძრაობას მსხვერპლი არ მოჰყოლია.

2023 წლის 14 იანვარს ლიფტის გაუმართაობას თბილისში ახალგაზრდა ცოლ-ქმარი შეეწირა. ვაზისუბანში უბედური შემთხვევა მაშინ მოხდა, როდესაც ლიფტი გამოიძახეს, თუმცა, კარი ისე გაიხსნა, რომ ლიფტის კაბინა იმ სართულზე არ იყო. მამაკაცი შახტაში ჩავარდა, მის დახმარებას მეუღლე ცდილობდა, რა დროსაც ლიფტი დაიძრა და ორივე გარდაიცვალა.

გაუმართავი ლიფტების თვალსაზრისით თბილისში განსაკუთრებით მძიმე ვითარებაა. არაოფიციალური ინფორმაციით, სულ 15 000 ლიფტი მოძრაობს, რომელთაგან მხოლოდ 10%-ია სრულიად გამართული. ძველი კორპუსების ლიფტების აბსოლუტური უმრავლესობის შესახებ კონკრეტული ცნობები არ მოიპოვება, შესაბამისად არ ვიცით შეესაბამება თუ არა თანამედროვე სტანდარტებსა და უსაფრთხოების თუნდაც ელემენტარულ მოთხოვნებს.

ამის მიუხედავად ის ლიფტები, რომლებსაც ექსპლუატაციის ვადა დიდი ხნის წინ ამოეწურათ, მაინც "მუშაობენ." მის განახლებაზე კი არც მობინადრეები და არც ქალაქის ხელმძღვანელობა არ ზრუნავს. არადა ამორტიზებული მექანიზმების მთელი წყება ადრე თუ გვიან კატასტროფული შედეგით სრულდება.