მსოფლიოს ყურადღების ცენტრში ევროპის ცენტრალური ბანკი იქნება, რომელმაც მონეტარულ პოლიტიკასთან დაკავშირებით გადაწყვეტილება უნდა მიიღოს. სავარაუდოდ, ECB რეფინანსირების განაკვეთს უცვლელად, 4.5%-იან ნიშნულზე დატოვებს. გარდა ამისა, ევროპის წამყვანი ეკონომიკები - გერმანია, საფრანგეთი, იტალია და ესპანეთი ძირითად მაკროეკონომიკურ მონაცემებს გაასაჯაროებენ, მათ შორის: მშპ-ის ზრდის, ინფლაციის, უმუშევრობის, სიღარიბისა და საგარეო ვაჭრობის მაჩვენებლებს.
ეკონომიკურ ზრდაზე ფოკუსი იქნება ამერიკის შეერთებულ შტატებშიც, სადაც ფედერალური სტატისტიკის სამსახური მიმდინარე III კვარტლის მთლიანი შიდა პროდუქტის ზრდის საბოლოო მაჩვენებელს გაასაჯაროებს.
ანალიტიკოსების შეფასებით, წინა კვარტალთან შედარებით, აშშ-ის ეკონომიკა 4.1%-ით იქნება გაზრდილი. გარდა ამისა, მომავალ კვირას ცნობილი გახდება აშშ-ში არსებული უმუშევრობის დონე, საწარმოო ხარჯების ინდექსი და უძრავი ქონების გაყიდვების მონაცემები.
ტრადიციულად, სიახლეები იქნება აზიის რეგიონშიც. იაპონია ინფლაციასთან დაკავშირებით უახლეს მონაცემებს წარმოადგენს, ჩინეთი კი საგარეო ვაჭრობის, უცხოური ინვესტიციების და ინფლაციის უახლეს სტატისტიკას გაასაჯაროებს.
რაც შეეხება საქართველოს, სტატისტიკის ეროვნული სამსახური შემდეგ მონაცემებს გაასაჯაროებს: საცხოვრებელი უძრავი ქონების ფასების ინდექსი (2023 წლის III კვარტალი), ყოველთვიური ენერგეტიკული სტატისტიკის მაჩვენებლები (2023 წლის აგვისტო), საფოსტო და საკურიერო საქმიანობით დაკავებული საწარმოების გამოკვლევის შედეგები (2022 წელი).

#ახალიამბები #BusinessMediaGeorgia