„ნატოს-საქართველოს სწავლება 2019“ პირველად ქართული მხარის ხელმძღვანელობით ჩატარდება.სწავლების ძირითადი დაგეგმვის კონფერენციას ნატო-საქართველოს წვრთნებისა და შეფასების ერთობლივმა ცენტრმა (JTEC) უმასპინძლა. კონფერენცია ოფიციალურად, წვრთნებისა და სამხედრო განათლების სარდალმა, პოლკოვნიკმა გრიგოლ ჭელიძემ და ამერიკის სამხრეთ-აღმოსავლეთ მრავალეროვნული დივიზიის მეთაურის მოადგილემ, ბრიგადის გენერალმა ტომას კარდენმა გახსნეს. ნატოს „მოკავშირეთა სარდლობის“ (ACT), ალიანსის წევრი, პარტნიორი ქვეყნებისა და ქართული მხარის წარმომადგენლები დაგეგმარებაზე, ნატო-საქართველოს წვრთნებისა და შეფასების ერთობლივ ცენტრში (JTEC) სამი დღის განმავლობაში იმსჯელებენ.

მომავალ წელს სწავლება ნატო-საქართველოს წვრთნებისა და შეფასების ერთობლივ ცენტრში ჩატარდება. მნიშვნელოვნად გაზრდილია მონაწილეთა რაოდენობაც. „ნატო-საქართველოს სწავლება 2019“ ნატო-საქართველოს არსებითი პაკეტის ფარგლებში (SNGP) ხორციელდება.

სწავლების განმავლობაში ქართველი სამხედრო მოსამსახურეები კომპიუტერული სიმულაციების მეშვეობით ნატოს ოპერაციების დაგეგმვისთვის საჭირო უნარ-ჩვევებს განივითარებენ. სწავლება ხელს შეუწყობს ჩრდილო-ატლანტიკურ ალიანსთან საქართველოს თავსებადობის ამაღლებას.

ნატო-საქართველოს სწავლება პირველად საქართველოში 2016 წელს ჩატარდა.