ესპანეთის საგარეო საქმეთა მინისტრი ალფონსო დასტისი არ გამორიცხავს, რომ კატალონიაში კრიზისი რეგიონის ავტონომიის სტატუსის გაფართოებით დასრულდეს. ამის შესახებ ინფორმაციას „ესოშიეიტიდ პრესი“ ავრცელებს.
მინისტრი აღნიშნავს, რომ კატალონიის მთავრობის მეთაურობიდან დათხოვნილ კარლეს პუიჩდემონს დეკემბერში დაგეგმილ რეგიონულ არჩევნებში „თეორიულად“ მონაწილეობის მიღებაც შეუძლია, იმ შემთხვევაში, თუ მას თავისუფლების აღკვეთას არ შეუფარდებენ.
ალფონსო დასტისი ასევე მიმართავს დამოუკიდებლობის მომხრე მოქალაქეებს და მოუწოდებს, პატივი სცენ 21 დეკემბერს დაგეგმილ არჩევნებს.
კატალონიის პარლამენტმა რეგიონის დამოუკიდებლობის გამოცხადების შესახებ რეზოლუციის პროექტი 27 ოქტომბერს დაამტკიცა. საპასუხოდ, ოფიციალურმა მადრიდმა კონსტიტუციის 155-ე მუხლი აამოქმედა, კატალონიის მთავრობა დაითხოვა, რეგიონი კი ცენტრალურ ხელისუფლებას დაუქვემდებარა და კატალონიაში არჩევნები დანიშნა. კარლეს პუიჩდემონმა მადრიდის გადაწყვეტილებას დაუმორჩილებლობა გამოუცხადა.