იტალიის ორ რეგიონში, ლომბარდიასა და ვენეტოში რეფერენდუმზე მისულმა ამომრჩევლებმა რეგიონული ავტონომიების გაფართოებას დაუჭირეს მხარი.

ვენეტოსა და ლომბარდიაში ამ საკითხზე რეფერენდუმი გუშინ გაიმართა.

ადგილობრივი ხელისუფლების მონაცემებით, ლომბარდიაში რეფერენდუმზე აქტივობამ 40%, ვენეტოში კი 60% შეადგინა. საარჩევნო უბნებთან მისულ მოქალაქეთა 90%-ზე მეტი ავტონომიის გაფართოებას ემხრობა.

ლომბარდიასა და ვენეტოშიც გუბერნატორის პოსტს პოპულისტური პარტია „ჩრდილოეთის ლიგის“ წევრები იკავებენ. საყოველთაო გამოკითხვა სწორედ მათი ინიციატვით შედგა. აღსანიშნავია ისიც, რომ ვენეტოსა და ლომბარდიაში გამართული პლებისციტის შედეგები შესასრულებლად სავალდებულო არ არის.

რომში აცხადებენ, რომ რეფერენდუმი საჭირო არ იყო, რადგან კონსტიტუციით ავტონომიის გაფართოების საკითხზე მოლპარაკებების დაწყება ისედაც შესაძლებელი იყო. რეგიონი ლომბარდია, სადაც მილანი მდებარეობს და ვენეტო, რომლის ტერიტორიაზეც განაგებულია ვენეცია, იტალიის მთლიანი შიდა პროდუქტის 30%-ს ქმნის. ავტონომიის გაფართოების მომხრეები მიიჩნევენ, რომ შემოსავლების განაწილება არათანაბრად ხდება და ფინანსების უფრო დიდი ნაწილი რეგიონების განვითარებას უნდა მოხმარდეს.