მასობრივი პროტესტი არ ცხრება უკვე მეორე დღეა მისურის შტატის ქალაქ სენტ-ლუისში.

ამერიკაში ათასობით დემონსტრანტი პოლიციელ ჯეისონ სტოკლისთვის გამოტანილ გამამართლებელ განაჩენს აპროტესტებს.

სამართალდამცავმა, 2011 წელს, 24 წლის აფროამერიკელი ბიჭი მოკლა. აქტივისტები სენტ-ლუისში პოლიციელის სახლთან შეიკრიბნენ და მთელი ღამის განმავლობაში ანტირასისტულ სლოგანებს სკანდირებდნენ.

მისურის ერთ-ერთ ქალაქში გამართული აქციები ვერდიქტის გამოცხადებისთანავე პოლიციასა და დემონსტრანტებს შორის ფიზიკურ დაპირისპირებაში გადაიზარდა.

შეტაკებების შედეგად ცხრა სამართალდამცველი დაშავდა, აქციის 35-მდე მონაწილე კი დაპატიმრებულია.