ამერიკის შეერთებული შტატების მიერ ვენესუელის წინააღმდეგ დაწესებული სანქციები ოფიციალურმა კარაკასმა ვაშინგტონის მხრიდან განხორციელებულ ზეწოლად შეაფასა. ქვეყნის საგარეო საქმეთა მინისტრმა, ხორხე არეასამ გაერო-ს გენერალურ მდივან ანტონიო გუტერესს თხოვნით მიმართა, მომხდარზე რეაგირება მოახდინოს. არეასა მიიჩნევს, რომ ტრამპის ადმინისტრაციის მიზანია, ვენესუელაში სახელმწიფო გადატრიალება მოხდეს.

დონალდ ტრამპმა ვენესუელის ავტორიტარული მთავრობა ძალაუფლების უზურპაციასა და დიქტატურის დამყარებაში დაადანაშაულა, რასაც სანქციების გამკაცრება მოჰყვა.

თეთრი სახლის დილის ბრიფინგზე ფინანსთა მდივანმა, სტივ მნუჩინმა განაცხადა, რომ ოფიციალური კარაკასის წინააღმდეგ მორიგი სანქციები დაწესდება, შავი სია კი გაფართოვდება.

„ჩვენ ვაფრთხილებთ ყველას, ვინც ამ რეჟიმის გაძლიერებაში მონაწილეობას იღებს, გაემიჯნონ ძალადობას საკუთარი მოქალაქეების წინააღმდეგ და დიქტატურას, რომელიც მადურომ ვენესუელაში დაამყარა. ყველა ნაბიჯი, რომელიც აქამდე ამერიკის შეერთებულ შტატებს ვენესუელასთან მიმართებით გადაუდგამს და რომელსაც მომავალში გადადგამს, ვენესუელელი ხალხის კეთილდღეობასა და თავისუფლებას ემსახურება“, - განაცხადა მნუჩინმა.

ვენესუელაში მესამე წელია უმძიმესი ეკონომიკური კრიზისი მძვინვარებს, ანტისახელისუფლო აქციები კი ოთხი თვეა მიმდინარეობს. პროტესტი პრეზიდენტის მიერ საკონსტიტუციო ასამბლეის შექმნის ინიციატივას მოჰყვა, რაც ოპოზიციის მიერ კონტროლირებადი პარლამენტის დათხოვას ემსახურებოდა. პროტესტის დასარბევად, ნიკოლას მადურომ ტანკები და სპეცრაზმი გამოიყენა, რასაც 130-მდე ადამიანის სიცოცხლე ემსხვერპლა, მათ შორის ორი მოზარდის, ხოლო 5000-ზე მეტი ადამიანი პოლიტიკური ნიშნით დაპატიმრებულია.

OPEC-ის წევრი ვენესუელა მოსკოვის ერთ-ერთი ყველაზე ახლო მოკავშირე ქვეყანაა ლათინურ ამერიკაში. ვენესუელის მთავრობამ 2008 წლის 10 სექტემბერს საქართველოს ოკუპირებული ტერიტორიების - აფხაზეთისა და ცხინვალის რეგიონის ე.წ. დამოუკიდებლობა აღიარა.

წყარო: Reuters, NBC