ბორჯომის ხეობაში სტიქიასთან ხუთდღიანი ბრძოლა, სავარაუდოდ, ფინალურ ეტაპზეა.
წინა დღეებთან შედარებით, სიტუაცია შედარებით დასტაბილურდა. ბოლო საათების მონაცემებით, ხანძრის გავრცელების არეალის გაზრდის საფრთხე აღარ არსებობს.
სპეციალური თხრილებით ლოკალიზებულია ცეცხლის თითქმის ყველა კერა, გარდა იმ წერტილებისა, რომლებიც ქარის გამო ხელახლა გაღვივდა.
ერთ-ერთ ყველაზე პრობლემურ ადგილიდან კვლავ სოფელ დაბის მიმდებარე ტერიტორია რჩება.
სტიქიის ეპიცენტრში ხანძრის ჩაქრობას 1 800-მდე ადამიანი ცდილობს. სამაშველო ოპერაციაში დღესაც ჩართულია ავიაცია. ბოლო ინფორმაციით, მასშტაბურმა ხანძარმა ჯამში 100 ჰექტრამდე ტერიტორია გაანადგურა. თუ ამინდი არ გაუარესდება, საგანგებო შტაბი ცეცხლის დარჩენილი კერების ლოკალიზებას ხვალისთვის ვარაუდობს.
გენო ოსიყმაშვილი მუშაობს სტიქიის ზონაში.