ამ დრომდე მძიმეა ვითარება ბორჯომის ხეობაში. მასშტაბურ ხანძარსაწინააღმდეგო ოპერაციაში სახმელეთო და საჰაერო ძალებია ჩართული. სოფელ დაბასთან ტყის მასივში გაჩენილი ცეცხლის ლოკალიზებას სასაზღვრო პოლიციის ორი და აზერბაიჯანული მხარის მიერ გამოგზავნილი ერთი ვერტმფრენი ცდილობს.
მობილიზებულია 400-მდე მეხანძრე-მაშველი, ასზე მეტი ტყის მცველი და შინაგან საქმეთა სამინისტროს საგანგებო დავალებათა დეპარტამენტის 500 თანამშრომელი.
ვითარების გართულების შემთხვევაში შემუშავებულია მოსახლეობის ევაკუაციის გეგმა. სტიქიასთან ბრძოლის ოპერაციაში დამატებით ორი თურქული ვერტმფრენიც უნდა ჩაერთოს. საქართველოში ასევე ელოდებიან სპეციალურ თურქულ სახანძრო თვითმფრინავს.
სამი დღის წინ გაჩენილი ხანძრის ლოკალიზება გუშინ მოხერხდა, თუმცა ძლიერი ქარის გამო ცეცხლი კვლავ გაძლიერდა, გაჩნდა ახალი კერები.
ამ ეტაპზე სტიქური ზონის პერიმეტრი რამდენიმე ათეულ კილომეტრზეა გადაჭიმული. ცეცხლმა უკვე მოიცვა 12 ჰექტარზე მეტი ფართობი. ხანძრის ლოკალიზებას რთული რელიეფი და ცვალებადი ქარი ართულებს.
სტიქიის ზონაში მუშაობას განაგრძობენ „მოამბის“ გადამღები ჯგუფები. ადგილზე არიან სალომე ქოქიაშვილი და ნოდარ ჩაჩუა.
რა ვითარებაა ადგილზე -უახლეს ინფორმაციას ისინი პირდაპირ ეთერში მოგვაწვდიან.