საქართველოს პრეზიდენტი საკონსტიტუციო ცვლილებებზე მსჯელობის განახლებას სწორ ნაბიჯად მიიჩნევს და მოუწოდებს ყველა მხარეს, რომ ჩაერთოს ამ განხილვებში. ამის შესახებ საქართველოს პრეზიდენტმა ჟურნალისტებს საპარლამენტო უმრავლესობის ლიდერის არჩილ თალაკვაძის შეთავაზებაზე საპასუხოდ განაცხადა.
„პროცესის მთავარი ნაკლი იყო კონსულტაციებისა და ერთმანეთთან თათბირის არარსებობა. ნებისმიერი ნაბიჯი, რომელიც გადადგმულია მოლაპარაკებებისკენ, არის სწორი ნაბიჯი და მოვუწოდებ ყველა მხარეს, რომ ჩაერთოს ამ პროცესში.
მაგრამ როდესაც გულწრფელად გინდა სხვებთან შეთანხმება და არა ვინმესთვის ხელის გადაგრეხვა, პირველ რიგში, უკან უნდა გადადგა ნაბიჯი იქიდან, რაც უკვე გააკეთე ამ თვალსაზრისით, როდესაც ორი მოსმენით სრულიად უპრეცედენტო სისწრაფით, ერთპარტიული პროექტი მიიღე კონსტიტუციის,
გულწრფელობა გამოჩნდებოდა მაშინ, თუ საკონსტიტუციო ცვლილებების ორი მოსმენის შედეგებს გავაუქმებდით და მართლა დავიწყებდით საუბარს ქვეყნის ძირითადი კანონის თაობაზე“, - განაცხადა გიორგი მარგველაშვილმა.