საქართველოსნაირ ქვეყანაში სტრატეგიულად მნიშვნელოვანია, რომ პრეზიდენტს ჰქონდეს მთავარსარდლის ფუნქცია, - ამის შესახებ გიორგი მარგველაშვილმა სულხან-საბა ორბელიანის უნივერსიტეტში სტუდენტებთან შეხვედრისას განაცხადა.
მისი თქმით, პრინციპულ საკითხებში, რომელიც მას საკონსტიტუციო ცვლილებებთან დაკავშირებით აქვს, ერთ- ერთი მთავარი სწორედ ეს არის.
"როდესაც პრეზიდენტს ასახელებ უმაღლეს მთავარსარდლად, მას უნდა ჰქონდეს შესაბამისი კომპეტენციები არა მხოლოდ ომიანობის დროს, არამედ ომამდეც, რომ უფრო მეტად განამტკიცოს ქვეყნის თავდაცვისუნარიონობა“,- განაცხადა პრეზიდენტმა.
სტუდენტებთან მარგველაშვილმა პრეზიდენტის არჩევის წესზეც ისაუბრა.
„არის საუბარი არჩევის წესთან დაკავშირებით. არჩევა შეიძლება პირდაპირიც და არაპირდაპირაც, ორივე დემოკრატიულია, მაგრამ როცა საზოგადოების უმრავლესობას უნდა აირჩიოს პირდაპირი წესით, რამდენად დემოკრატიულია ამ ხალხს უთხრა უარი? რამდენად გესმის დემოკრატიისა და კონსტიტუციის აზრი, როცა უბრალოდ ეუბნები, რომ არა, 300 ხმოსანი აირჩევს", -აღნიშნა გიორგი მარგველაშვილმა.