ისრაელის პროკურატურის მიერ გაკეთებულ განცხადებას, რომელიც პრემიერ-მინისტრის საქმეში ახალი დეტალების გამოკვეთას ეხება, იერუსალიმში საპროტესტო აქცია მოჰყვა. ქუჩაში გამოსული 200-მდე აქტივისტი მთავრობას კორუფციაში ადანაშაულებს და კითხვებზე პასუხს ითხოვს.
ისრაელის პროკურატურა მმართველი კონსერვატიული პარტია „ლიკუდის“ ლიდერ ბენიამინ ნეთანიაჰუს ქრთამის აღებისა და თაღლითობის ორ ეპიზოდზე ედავება.
პირველი საქმე ისრაელელი ბიზნესმენებისგან ქრთამის სახით ძვირადღირებული სიგარებისა და შუშხუნა ღვინის მიღებას ეხება. საქმეში წერია, რომ პრემიერმა აღნიშნული ძვირადღირებული საჩუქრების სანაცვლოდ ბიზნესმენებისთვის სასარგებლო გადაწყვეტილებას მოაწერა ხელი.
მეორე საქმე გაცილებით მძიმეა: პროკურატურის მტკიცებით, რამდენიმე წლის წინ პრემიერმა ნეთანიაჰუმ რეიტინგულ გამოცემა Yediot Aharonot-თან საიდუმლო შეთანხმება გააფორმა, რისი მთავარი მიზანი მთავრობისადმი ოპოზიციურად განწყობილი ჟურნალ-გაზეთებისთვის კონკურენციის გაწევა და მთავრობის ინტერესების გატარება იყო, კერძოდ მთავრობის სასარგებლო ინფორმაციის გავრცელება. ისრაელის კანონმდებლობით, თანამდებობის პირსა და პრესას შორის ამგარი გარიგებები უკანონოდ ითვლება.
ბენიამინ ნეთანიაჰუ, რომელსაც პრემიერ-მინისტრის თანამდებობა 11 წელია უკავია, ორივე ბრალდებას უარყოფს.
ავადროულად, გამოძიება მიმდინარეობს პრემიერ-მინისტრის მეუღლის წინააღმდეგ. პროკურატურა სარა ნეთანიაჰუს მეუღლის საშუალებით პირადი ხარჯებისთვის სახელმწიფო ბიუჯეტის გაფლანგვაში სდებს ბრალს. სარა ნეთანიაჰუ აღნიშნულ საქმეზე უკვე რამდენჯერმე დაიკითხა.
გამოძიება რამდენიმე თვის წინ დაიწყო. ისრაელის პროკურატურამ ორი დღის წინ განაცხადა, რომ საქმეში ახალი დეტალები გამოიკვეთა, რასაც უახლოეს მომავალში გაასაჯაროვებს.
ოპოზიცია აცხადებს, რომ გამოძიების შედეგი პრემიერ-მინისტრის იმიჯს მნიშნელოვნად შელახავს, თუმცა ისრაელის კონსტიტუციით, მთავრობის მეთაურის გადადგომა აღნიშნული თანამდებობიდან საკმაოდ რთული და ხანგძლივი პროცედურაა.