სახალხო დამცველმა უჩა ნანუაშვილმა აზერბაიჯანელი ჟურნალისტის აფგან მუხტარლის დაზარალებულად ცნობასა და მის მიმართ შინაგან საქმეთა სამინისტროს თანამშრომლების მიერ ეფექტიანი გამოძიების უზრუნველყოფის წინადადებით მთავარ პროკურატურას წერილობით მიმართა.
ომბუდსმენი მიიჩნევს, რომ მუხტარლის მიმართ შსს-ს თანამშრომლების მიერ ჩადენილი შესაძლო დანაშაულის ფაქტზე გამოძიების წარმოება იმავე სამინისტროს მიერ ვერ უზრუნველყოფს ეფექტიანი გამოძიებისთვის საჭირო დამოუკიდებლობის ხარისხს.
ომბუდსმენი მიიჩნევს, რომ მუხტარლის დაზარალებულის სტატუსი უნდა მიენიჭოს, რათა მას და მის ადვოკატს მეტი შესაძლებლობა ჰქონდეთ, დააკვირდნენ შსს-ს თანამშრომლების მხრიდან შესაძლო დანაშაულის ჩადენასთან დაკავშირებით მიმდინარე გამოძიებას.
„სამწუხაროა, რომ გამოძიების დაწყებიდან ერთი თვისა და რამდენიმე დღის გასვლის შემდეგ, საზოგადოებისთვის ინფორმაციის მიწოდება ვერ ხერხდება“, - აცხადებს ნანუაშვილი.
ომბუდსმენი იმედს გამოთქვამს, რომ მთავარი პროკურატურა დროულ რეაგირებას მოახდენს მის წინადადებაზე. უჩა ნანუაშვილი პროცესებში ჩასართავად აზერბაიჯანის სახალხო დამცველსაც მიმართავს.