საქართველოს პარლამენტის თავმჯდომარის ირაკლი კობახიძის განცხადებით, არასამთავრობო ორგანიზაციების მიმართვა პრეზიდენტისადმი, რომ თვითმმართველობის კოდექსში შესატან ცვლილებებს ვეტო დაადოს, გაუგებარია.
როგორც ირაკლი კობახიძემ სტრასბურგში ქართველ ჟურნალისტებს განუცხადა, პარლამენტის წარმომადგენლები არასამთავრობო სექტორის წევრებს შეხვდნენ თვითმმართველობის რეფორმასთან დაკავშირებით და მოისმინეს მათი არგუმენტები.
"ჩვენ ვთხოვეთ არასამთავრობო სექტორის წევრებს, წარმოედგინათ კონტრარგუმენტები ამ რეფორმასთან დაკავშირებით და მათ ეს ვერ მოახერხეს. აქედან გამომდინარე, ეს პოზიცია ჩვენთვის არის, რბილად რომ ვთქვათ, გაუგებარი. შესაბამისად, ჩვენთვის მოსაწონი ვერ იქნება ასეთი მიმართვა პრეზიდენტისადმი“, - განაცხადა კობახიძემ.
არასამთავრობო ორგანიზაციების ნაწილი პრეზიდენტს "საქართველოს ადგილობრივი თვითმმართველობის კოდექსში შესატან ცვლილებებზე" ვეტოს დადებას სთხოვს.