ნიკოლოზ ბასილაშვილის წარმატებული სტარტი უიმბლდონის საჩოგბურთო ტურნირზე - ქართველმა ჩოგბურთელმა რამდენიმე წუთის წინ არგენტინელი კარლოს ბერლოკი ორ საათსა და 20 წუთში დაამარცხა.

პირველ სეტში ნიკამ ორი ბრეიკ პოინტი შეასრულა, თავად კი საკუთარი მოწოდება მხოლოდ ერთხელ დათმო. საბოლოოდ 6-4 დაფიქსირდა.

მეორე სეტი გაცილებით დაძაბული გამოდგა. ანგარიშით 5-5-ზე ნიკამ კიდევ ერთი ბრეიკი შეასრულა და სეტზე აწვდიდა, თუმცა საკუთარი მოწოდება კვლავ წააგო.

ყველაფერი ტაიბრეიკზე გადაწყდა, რომელშიც ქართველი უფრო ძლიერი აღმოჩნდა (7-3). მესამე სეტში ქართველმა ჩოგბურთელმა მეტოქეს შანსი აღარ დაუტოვა და 6-1 აჯობა.

ბასილაშვილის მეტოქე მომდევნო ეტაპზე ამერიკელი სემ ქიურეი იქნება, რომელიც მსოფლიო რეიტინგში 28-ე ადგილზეა. ქიურეიმ დღეს იტალიელი ტომას ფაბიანო ასევე სამ სეტში, ანგარიშით 7-6, 7-5, 6-2 დაამარცხა.

ბასილაშვილი-ქიურეის მატჩი ზეგ გაიმართება.