„ევროპული საქართველოს“ ერთ-ერთი ლიდერის გივი თარგამაძის შეფასებით, მისი ავტომანქანის აფეთქების საქმის გამოძიებაზე ხელისუფლებას პოლიტიკური ნება არ გააჩნია.
თარგამაძე თბილისის პროკურატურაში დღეს ამ საქმეზე მიმდინარე გამოძიების მასალებს გაეცნო. მისი თქმით, გამოძიებისგან დღეს გაიგო, რომ დიმიტრი აბრამიშვილის შესახებ, რომელიც, თარგამაძის ცნობით, მისი ავტომანქანის აფეთქებაში მონაწილეობდა, გამოძიება ცალკე წარმოებად დაიწყო და, მისივე შეფასებით, ეს პროცესი კიდევ 9 თვის განმავლობაში გაჭიანურდება.
„ევროპული საქართველოს“ ერთ-ერთი ლიდერი ამბობს, რომ საქმე 3 ივლისს სასამართლოში გადაინაცვლებს. ამ საქმეზე ერთი პირი, რომელსაც ბრალი ჰქონდა წარდგენილი, თარგამაძის ცნობით, 6- წლიანი პირობითი სასჯელით გათავისუფლებულია, ხოლო კიდევ ერთი პირი კვლავ ძებნაში იმყოფება.
თარგამაძის ავტომანქანა რომლითაც ის გადაადგილდებოდა, გასული წლის ოქტომბერში აფეთქდა, რამდენიმე ადამიანი დაშავდა.