თავდაცვისა და უშიშროების კომიტეტის სხდომაზე, სადაც კონსტიტუციის პროექტის განხილვა მიმდინარეობდა, ერთმანეთს სიტყვიერად პარლამენტის თავმჯდომარე და უშიშროების საბჭოს მდივანი დაუპირისპირდნენ.
ირაკლი კობახიძის გაღიზიანება დავით რაქვიაშვილის მიერ გამოთქმულ შენიშვნებს მოჰყვა, რომელიც უშიშროების საბჭოს გაუქმებას უკავშირდებოდა.
დღევანდელ საკომიტეტო მოსმენაზე კონსტიტუციის ის თავი განიხილეს რომელიც თავდაცვასა და უსაფრთხოებას ეხება.
კომიტეტის თავმჯდომარე ირაკლი სესიაშვილმა დეპუტატებს წინადადებით მიმართა, კონსტიტუციაში ტერმინები "შეიარაღებული ძალები" და "სამხედრო ძალები" შეიცვალოს ტერმინით "თავდაცვის ძალები".
3-საათიანი განხილვის შემდეგ კონსტიტუციის პროექტს კომიტეტის სხდომაზე კენჭი უყარეს. მხარი მას მხოლოდ ოპოზიციამ არ დაუჭირა.