აფგან მუხტარლის ადვოკატებმა შესაძლოა ადამიანის უფლებათა ევროპულ სასამართლოს მიმართონ.
აზერბაიჯანელი ჟურნალისტის მეუღლე ლეილა მუსტაფაევა პროკურატურას უმოქმედობაში ადანაშაულებს და აცხადებს, რომ უწყებას საქმის გამოძიება მისი მეუღლის გატაცებიდან 24 საათის შემდეგ უნდა დაეწო.
მუსტაფაევა ამბობს, რომ საქმის სამართლიანი გამოძიება არ ხდება, რის გამოც ადვოკატებმა შესაძლოა სტრასბურგის სასამართლოს მიმართონ.
ლეილა მუსტაფაევა პრემიერ-მინისტრის იმ განცხადებასაც გამოეხმაურა, რომლის მიხედვითაც, გიორგი კვირიკაშვილმა აზერბაიჯანელი ჟურნალისტის საქმეში საქართველოს სახელმწიფოს სტრუქტურების მონაწილეობა გამორიცხა.
მუსტაფაევა ამბობს, რომ პრემიერის განცხადება კითხვებს ბადებს, რის გამოც ის ეჭვობს, რომ ქართული მხარე აზერბაიჯანის მთავრობასთან თანამშრომლობს.
ლეილა მუსტაფაევა გუშინ ძველი თბილისის სამმართველოში იმყოფებოდა, სადაც უსაფრთხოების საკითხებთან დაკავშირებით კონსულტაციები გაიარა. შეხვედრაზე გადაწყდა, რომ აზერბაიჯანელი ჟურნალისტის ოჯახს დაცვა დაენიშნება.