ვინ წარმოადგენს საქართველოს ადამიანის უფლებათა ევროპულ სასამართლოში - კანდიდატების შესარჩევად ქართულ მხარეს ხელახალი კონკურსის გამოცხადება მოუწევს.
ჯერ კიდევ ერთი წლის წინ შერჩეული სამი კანდიდატიდან ერთ-ერთი ევროპის საბჭოს მოსამართლეების არჩევის კომიტეტს დღეს უნდა დაემტკიცებინა, თუმცა საკმარისი ხმები ვერცერთმა მათგანმა ვერ მიიღო.
სტრასბურგის ადამიანის უფლებათა ევროპული სასამართლოს მოსამართლედ საქართველოდან გიორგი ბადაშვილი, ევა გოცირიძე და ალექსანდრე ბარამიძე იყვნენ წარდგენილები. ისინი იუსტიციის მინისტრის ხელმძღვანელობით შექმნილმა ქართულმა სამთავრობო კომისიამ გასაუბრების შედეგად შეარჩია.
როგორც საქართველოს პარლამენტის იურიდიულ საკითხთა კომიტეტის თავმჯდომარემ ეკა ბესელიამ განმარტა, კომიტეტმა საჭიროდ ჩათვალა, რომ საქართველოს მთავრობამ პროცედურები ხელახლა გაიაროს და ახალი კანდიდატები წარადგინოს.
„ბევრი არასწორი და ცრუ ინფორმაცია ვრცელდება იმ ადამიანების მხრიდან, ვინც არც მონაწილეა და არც პირველწყაროდან არ აქვს ინფორმაცია. კომიტეტი არის დახურული და ინფორმაცია კონფიდენციალურია. ვინც იცავს ამ წესებს და განსაკუთრებით ისინი ვისაც დიპლომატიური წარსული აქვთ, უნდა იცოდნენ, რომ ამ ინფორმაციების გავრცელება დახურული კომიტეტის შინაარსობრივ ნაწილზე, არ შეიძლება. რეალობაა ის, რომ კომიტეტის წევრთა უმრავლესობამ მიიჩნია, რომ პროცედურები თავიდან უნდა იყოს გავლილი“ - განაცხადა ეკა ბესელიამ.